Categoría: Actividades Páxina 8 de 9
A Asociación de Médicos Galegos (Asomega) decidiu outorgar o premio “A Fonte Limpa” na primeira edición deste premio á iniciativa do Museo do Médico Rural de Maceda, promovida polo doutor José Manuel Lage.
As pezas situadas no Museo foron doadas por institucións, familias e particulares como o presidente de Asomega, Xullo Anchochea, cuxo avó foi médico rural precisamente en Maceda.
O premio está dotado con 3.000 euros e recoñece e pon en valor a iniciativa do doutor Lage para enxalzar a especial relación que se establece entre o médico rural e o paciente, e para reivindicar unha forma de exercer a Medicina que se mantivo inalterada na súa esencia pese ao paso do tempo: o médico rural que atende o parto, acompaña na maduración e alivia nas últimas horas.
O museo do Médico Rural de Maceda colabora na elaboración dun panel informativo a modo de mural exposto no museo etnográfico da Casa do Patrón en Doade co seguinte texto:
“Un dos persoeiros do rural da nosa amada Galicia ao longo da historia foi o médico rural, que non era só o responsable da saúde dos seus habitantes, senón que tamén era veciño, amigo, confesor e psicólogo.
O seu traballo era continuo, durante as 24 horas do día, os 7 días da semana, os 365 días do ano. O salario que percibía era precario e, malia isto, tiña un grande ollo clínico. Caracterizábase polo seu grande altruísmo e porque acompañaba os seus pacientes ao longo de todas as etapas da súa vida.
As súas armas eran escasas, pero a observación e a exploración suplían todas as carencias que puidera haber. Podemos asegurar que eran uns heroes silenciosos, os médicos dos pobres e uns auténticos artesáns do seu oficio.
Deixáronnos como legado uns valores que debemos preservar. Eles foron vocacionais, nuns tempos en que a pobreza na nosa terra era una sinal de identidade e os recursos para curar, moi escasos e limitados.
Ata ben entrada a metade do século XX, as visitas aos domicilios dos pacientes nas aldeas facíanse a cabalo, pois o acceso era a través das corredoiras, uns camiños angostos e sinuosos. Os medicamentos elaborábanse nas boticas con fórmulas maxistrais e as plantas medicinais eran a base da súa preparación. Non había antibióticos nin vacinas.
O aparato de raios X chegou ao medio rural galego na década dos 40 e a penicilina nos 50.
Ata 1970, nas aldeas do noso rural, a maioría dos partos tiñan lugar nos propios domicilios e eran atendidos polos médicos do rural.
Os médicos rurais xamais deixaron de asistir e de lles dar consolo aos seus pacientes. Moitos de nós tivemos a agradable experiencia dunha relación humana e cálida entre o enfermo, a familia e o médico. “
Dentro da programación das xornadas SemFYC de Medicina Rural que se desenvolven no Centro Cultural Marcos Valcárcel (Rúa do Progreso nº 30 de Ourense) durante os días 5 e 6 de novembro de 2021, terán pezas na súa sede desprazadas do Museo Médico Rural de Maceda. , que se expoñerá de forma permanente e, durante esta actividade, contarase cunha guía que presentará, de forma interactiva, un percorrido pola historia da medicina rural.
En concreto, desenvolveranse dous obradoiros baixo o título: “Museo do médico rural: do estetoscopio de madeira ao iphone”
As xornadas están organizadas pola semFYC, a Sociedade Española de Medicina Familiar e Comunitaria.
O día 20 de outubro de 2021, na feira en Maceda, organizado pola Asociación Diabética Auria de Ourense en colaboración co Museo do Médico Rural e Asociación Escola Rural De Saúde da Limia estiveron presentes cunha actividade informativa diante da Farmacia Mª Elvira e coa colaboración da mesma.
Recibindo a visita de mais de 100 persoas para facer a medición dos niveis de azucra así como información e educación diabetológica e prantexar dubidas tanto relacionadas ca alimentación así como cos hábitos saudables.
Esta actividade está subvencionada pola Deputación Provincial de Ourense.
O doutor José Manuel Lage Parente baixo o título “Charla sobre a evolución do proceso de envellecemento, enfermidade e morte nas zonas rurais” organizado pola “Escola Rural de Saúde da Limia” reuniunos nun encontro próximo, entretido e coñecedor dunha experiencia de toda a vida como médico no rural ourensán. onde nos dixo a importancia de ter tamén un proxecto de vida na madurez e vellez da xente.
“A medicina non é unha ciencia exacta, especialmente nas zonas rurais, onde as peculiaridades do carácter galego, entre práctico, incrédulo e místico, dan unha mestura a ter en conta, e coa que o médico rural ten a sorte de manter un máis intensa relación cos seus pacientes “.
O doutor Lage Parente sabe do que fala despois de 42 anos como médico, estando á fronte do Museo do Doutor Rural de Maceda e inmerso na publicación do seu libro “Retazos da vida dun doutor rural”
O presidente de Asomega visitou o Museo Médico Rural de Maceda acompañado dos presidentes de PSN e do Parlamento de Galicia ademais do alcalde de Maceda.
O doutor José Manuel Lage, promotor e director do Museo Médico Rural Maceda, foi o encargado de amosar os tesouros deste centro aos presidentes de Asomega, Julio Ancochea, de PSN, Miguel Carrero, e do Parlamento de Galicia, Miguel Santalices nunha recente visita ás súas instalacións na que tamén participou o alcalde da vila, Rubén Quintas.
Asomega, a través do seu presidente, fixo varias doazóns de material médico-cirúrxico ao museo. Trátase de obxectos do primeiro terzo do século pasado como unha lámpada de quirófano, unha cadeira de madeira na que sentaba o doutor cando tomaba raios X ou pés de soro.
O presidente de Asomega, Julio Ancochea, explica que “o museo recoñece, entre outros, ao meu avó materno (Ramon Bermúdez Trasmonte)”, que era médico rural. Naceu en Maceda e exerceu “ata que se mudou, por amor, a Trives, onde desenvolveu a maior parte da súa carreira profesional como médico forense e APD (Home Public Assistance)”.
Xunto a el está o seu irmán José, tamén médico falecido prematuramente. “Ambos tiveron que facer fronte á tráxica epidemia da chamada” gripe española “de 1918”, explica Ancochea.
Crease a “Asociación Museo Do Médico Rural de Maceda” como organización de natureza asociativa e sen ánimo de lucro.
A Asociación crease cos seguintes fins:
- Difusión da figura do médico rural.
- Dar a coñecer a súa historia
- Promover a saúde do medio rural
- Realizar estudios sobre os nosos médicos rurais
Para levar a cabo os seus fins, a asociación poderá organizar as seguintes actividades:
- Visitas ó museo
- Difusión das actividades a través da páxina web.
- Charlas divulgativas de saúde en centros sociais e educativos (colexios, institutos, etc…)
- Creación dun premio sobre estudios relacionados coa medicina rural.
O Museo Etnográfico “Casa do Patrón” situado en Doade, Lalín (Pontevera) é un espazo para preservar, dar a coñecer e difundir aqueles signos que axudan a comprender e valorar a propia tradición.
Un museo para visitar e gozar da cultura e gastronomía tradicional galega.
O 28 de abril de 2021 visitamos este museo etnográfico, o máis grande de Galicia.
A nosa colaboración consistirá en recrear un consultorio médico rural.
COOPERACIÓN
A Deputación potenciará o “Museo do Médico Rural”, en Maceda, referente na súa temática
Ourense, 14 de abril 2021.- O presidente da Deputación de Ourense, Manuel Baltar, reuniuse hoxe no Pazo Provincial co responsable do “Museo do Médico Rural”, José Manuel Lage, e co alcalde de Maceda, Rubén Quintas, a quen confirmou o apoio por parte da institución provincial “para seguir potenciando este singular espazo expositivo, único no ámbito galego e nacional, cuxo éxito reflicte a homenaxe da sociedade ao papel do médico rural, profesionais fondamente vencellados ao territorio e á súa veciñanza”, salientou Baltar.
O presidente do goberno provincial expresou o agradecemento a José Manuel Lage por poñer a disposición do público a importante documentación e os obxectos que conforman o museo, situado nas instalacións municipais, e ao alcalde de Maceda, “por promover esta iniciativa cultural á que seguiremos dando apoio económico e tamén mediante publicacións e co plan de acción, fixado a medio e longo prazo, que significará dispoñer de instalacións propias e con elo, unha aposta pola súa difusión e promoción para ser un punto de atracción turística e mesmo para os estudosos da medicina”.