O 25 de abril de 2024 reunímonos no Liceo de Ourense para celebrar o primeiro aniversario da Asociación Ourensividad coa asistencia de máis de 200 persoas.
A inauguración do acto correu a cargo do Coro Escolar Plurilingüe Padre Feijoo-Zorelle, que dentro do seu repertorio convidou a todos os asistentes a acompañalos a través do baile.
A continuación, Cristina Conde Rodríguez, vicepresidenta de Ourensividad, fixo un breve resumo das actividades, medios que se fixeron eco do noso bo facer, algunhas das asociacións coas que colaboramos e un resumo fotográfico das actividades de todo este ano.
O presidente de Ourensividad, Pablo García Vivanco, reiterou o seu agradecemento a todos os presentes e a todos aqueles que o fixeron posible e contribuíron en maior ou menor medida a facer de Ourensividad a realidade que é, destacou os determinantes máis importantes da lonxevidade da a provincia de Ourense, sobre todo no importante que é a frescura dos alimentos, dando o feito de que Galicia é a primeira comunidade en consumo de alimentos frescos e a última en alimentos procesados.
Como parte central tivo lugar unha mesa redonda na que se abordaron diferentes determinantes da lonxevidade que temos na provincia. A mesa estivo moderada polo xornalista Juan Maceiras e contamos co presidente da asociación, o farmacéutico e nutricionista Pablo García Vivanco, que nos falou da lonxevidade dende o punto de vista da nosa Dieta Atlántica. A continuación, interveu o experto en termalismo, o experto en hidroloxía médica Antonio Freire, quen explicou a importancia das augas minerais para a saúde e as indicacións terapéuticas das augas termais. A mesa redonda concluíu con José María Failde, doutor en psicoloxía e presidente da Sociedade Galega de Xeriatría e Xerontoloxía, quen explicou a lonxevidade desde a perspectiva do envellecemento saudable e a importancia do encontro interxeracional.
Da man de Álvaro González, máis coñecido como DJ Tibu, homenaxeouse a catro centenarios, Esperanza, Laura, Olimpia e Pepa, aos que se lles entregou un pequeno detalle de agarimo por parte da asociación, a entrega correu a cargo de Manuel Pardo Cid, Delegado da Xunta en Ourense; Rosendo Fernández Fernández, presidente de Inorde, Turismo, Termalismo, representante da Deputación de Ourense; Tamara Silva Cid, concelleira do concello de Ourense na área de Dinamización, Facenda e Política Social e Pablo García Vivanco, presidente de Ourensividad.
O acto remata cunha interacción entre os nenos e nenas da Coral Escola Plurilingüe Padre Feijoo-Zorelle, que fixeron unhas preguntas aos centenarios.
A despedida correu a cargo do doutor José Manuel Lage, director do Museo do Médico Rural de Maceda e vicepresidente da asociación Ourensividad, quen reiterou o seu agradecemento a todas e todos, institucións, asociacións, particulares, amigos, que o fixeron posible e fan a realidade da Ourensividade é posible, granito a granito, sumando enerxía e esforzos.
Galería de imágenes:
